Ályktun flokksráðsfundar VG 9.-10. september
Ályktun flokksráðsfundar Vinstrihreyfingarinnar ? græns framboðs um efnahagsmál: Reykjavík 9.-10. september 2005
Flokksráð Vinstrihreyfingarinnar ? græns framboðs telur óumflýjanlegt og brýnt að gripið verði til samræmdra aðgerða til að tryggja efnahagslegan stöðugleika og átelur ríkisstjórnina fyrir háskalegt andvaraleysi. Flokksráðið vísar til tillagna þingflokks Vinstrihreyfingarinnar ? græns framboðs frá sl. vetri á þingskjali 1014 á 131. löggjafarþingi. (sjá www.althingi.is/altext/131/s/1014.html) þar sem meðal annars er lagt er til að stöðva allar frekari stóriðjuframkvæmdir. Vinstrihreyfingin - grænt framboð vill þess í stað leggja áherslu á fjölbreytni í atvinnuuppbyggingu, stuðning við lítil og meðalstór fyrirtæki og hvers kyns nýsköpun í atvinnumálum.
Ekkert af því sem nú er að gerast þarf að koma á óvart, allra síst stjórnvöldum sem sjálf bera mikla ábyrgð á því jafnvægisleysi sem nú er við að glíma í íslenskum þjóðarbúskap. Meginskýringar jafnvægisleysisins eru:
- Stóriðjustefnan, þ.e. hinar gríðarmiklu samanþjöppuðu framkvæmdir og ruðningsáhrif þeirra í efnahags- og atvinnulegu tilliti. Einnig væntingar sem haldið er við með því að boða viðstöðulaust áframhald stóriðjuframkvæmda í kjölfar þeirra sem nú standa yfir.
- Stórfelldar skattalækkanir á efnafólk á þenslutímum og sérstaklega að lögfesta áframhald þeirra mörg ár fram í tímann með tilheyrandi væntingum.
- Þensla á fasteignamarkaði, sem stjórnvöld bera líka sína ábyrgð á.
- Vaxandi misskipting og stóraukinn launamunur sem eðlilega veldur óróleika á vinnumarkaði og ólgu í þjóðfélaginu. Undirstöðustörf í þjóðfélaginu eins og uppeldi og fræðsla barna og ummönnun aldraðra og sjúkra eru hróplega illa launuð með tilheyrandi flótta úr viðkomandi greinum . Á sama tíma skammta milljarðamæringar fjármálaheimsins og stórfyrirtækjanna sér jafnvel milljónatugi í laun og önnur fríðindi á mánuði hverjum. Þessi þróun bitnar ekki síst á konum.
- Almennt andvaraleysi gagnvart veikleikum í hagkerfinu, svo sem geigvænlegum viðskiptahalla og skuldasöfnun heimila, atvinnulífs og sveitarfélaga, sem lengi hafa búið við óviðunandi afkomu.
- Skeytingaleysi gagnvart óviðunandi rekstrarskilyrðum útflutnings- og samkeppnisgreina og óviðunandi skilyrða til nýsköpunar í almennu atvinnulífi.
Störf tapast nú hundruðum saman þessa mánuðina vegna stóriðjuvandans í efnahagsmálum, sem lýsir sér í ofurgegni krónunnar, háum vöxtum og þenslu á ákveðnum sviðum vinnumarkaðar. Áhrifin eru hvað augljósust í fiskvinnslu, ferðaþjónustu og útflutnings- og samkeppnisiðnaði, þó þau séu einnig til staðar miklu víðar í hinu almenna atvinnulífi. Þetta gerist ýmist með því að starfsemi leggst af og vinnustöðum er lokað eða umsvifin flytjast úr landi. Þá er ekki síður tilfinnanlegt, með framtíðarhagsmuni þjóðarbúsins í huga, að skilyrði til nýsköpunar almennt í atvinnulífinu er nánast ekki fyrir hendi. Margvísleg tækifæri fara því forgörðum og mikill fjöldi starfa verður aldrei til borið saman við það sem orðið hefði við eðlilegar aðstæður.
Fráleitt er, eins og ýmsir talsmenn ríkisstjórnarflokkanna reyna nú að gera, að kenna Seðlabankanum einum um eða skella skuldinni á erlenda spákaupmenn þótt þeir grípi tækifærið eins og fleiri og taki að gera út á vaxtamuninn milli Íslands og nágrannalandanna.
