Breytingar á matvælalöggjöfinni harðlega gagnrýndar á fundi Vinstri grænna í gær
Húsfyllir var á fundi Vinstri grænna um matvælaöryggi og framtíð íslensks landbúnaðar í Bændahöllinni í gær. Fjöldi fólks tók þátt í umræðum um fyrirhugaðar breytingar á lögum þar sem leyft verður að flytja inn hrátt kjöt til landsins og var talsverður hiti í fundarmönnum.
Haraldur Benediktsson, formaður Bændasamtakanna, fagnaði að VG efni nú til umræðu um fyrirhugaðar breytingar og gagnrýndi það sem hann kallaði kæruleysislega afstöðu og ummæli ráðherra og stjórnmálamanna sem virtust umgangast þetta umfangsmikla og alvarlega mál af vanþekkingu. Hann lýsti yfir mikilli óánægju með að nánast ekkert samráð hafi verið við Bændasamtökin um efni frumvarpsins og að það sé nú keyrt í gegnum þingið án þess að samtökin fái tækifæri til að skoða frumvarpið ofan í kjölinn. Haraldur sagði það algjört frumskilyrði að fresta málinu fram á haust svo meiri tími gæfist til að bregðast við þeim stórfelldu breytingum sem boðaðar eru á einu bretti. Haraldur sagði ljóst hverjum frumvarpið kæmi til góða þar eð yfirburðastaða smásölukeðja á markaði yrði enn sterkari en fyrr, en um 80% smásölunnar er í höndum tveggja aðila. Haraldur minnti á að samtök bænda um allan heim hvetja nú til ábyrgrar og upplýstrar umræðu um fæðuöryggi þjóða, enda matvælabúskap heimsins ógnað, og það væri átakanlegt að heyra þá léttúð sem þessi mál fengju í opinberri umræðu hérlendis.
Haraldur Briem, sóttvarnalæknir, benti á að Íslendingar stæðu mjög framarlega í matvælaöryggi og að tekist hafi að halda sýkingum, m.a. kamfýlobakter og salmonellu, í algjöru lágmarki undanfarin ár. Haraldur sagði frammistöðu Íslendinga í þessum efnum vekja heimsathygli meðal fólks í faginu og að íslensk löggjöf hafi á ýmsan hátt verið í fararbroddi. Í öðrum löndum hafi árangurinn verið síðri og í mörgum löndum Suður-Evrópu sé ekki einu sinni fylgst með kamfýlobaktersýkingum og íslenskir ferðamenn komi því oft heim með slíka sýkingu þótt það uppgötvist ekki fyrr en þegar heim er komið.
Hildur Traustadóttir, framkvæmdastjóri Félags kjúklingabænda og Félags eggjaframleiðenda, sagði að neysla á kjúklingum hafi aukist mjög hratt hér á landi og það sé m.a. vegna þess að fólk treysti vörunni. Ekki aðeins hvað varðar sjúkdóma, sem eru þó miklu sjaldgæfari hér á landi en annars staðar, en líka vegna þess að kjúklingarnir sjálfir eru góðir og heilnæmir.. Í öðrum löndum sé til dæmis leyfilegt að vatnsmagn í kjötinu 20% en hér á landi er þetta aðeins 10%. Hérlendis fari sýktur kjúklingur aldrei á markað heldur sé umsvifalaust tekinn úr umferð, og við séum laus við ýmsa sjúkdóma sem herji á önnur lönd. Með innflutningi á hráu kjöti glatist þær afbragðs sjúkdómavarnir sem hér hafi tekist að byggja upp og þær muni með tímanum hrynja eins og spilaborg verði frumvarpið að lögum. Hildur sagði skjóta skökku við að unnið væri gegn neytendavernd með þessum hætti í stað þessu að styrkja hana, enda ætti það að vera metnaður hverrar þjóðar að framleiða góða landbúnaðarvöru.
Síðasti ræðumaður kvöldsins var Steingrímur J. Sigfússon, formaður Vinstri grænna. Steingrímur benti á að þessar breytingar séu í eins mikilli andstöðu og hugsast getur við þau markmið sem við eigum nú að huga að: Störf á landsbyggðinni eru ótrygg vegna kvótaskerðingar og þrengingar í atvinnulífinu, fæðuöryggi í heiminum er nú vafa undirorpið og loks gengur þetta gegn sjálfbærri þróun og baráttu okkar við hlýnun jarðar af völdum loftslagsbreytinga. Steingrímur gagnrýndi líka vinnubrögð ríkisstjórnarinnar og benti á að þótt það sé endurskoðunarákvæði í undanþágu okkar frá matvælalöggjöf ESB þá þýði það að sjálfsögðu ekki að undanþágan eigi sjálfkrafa að falla niður. Endurskoðunin er á hendi ríkisstjórnarinnar og við þurfum að gera raunverulega tilraun til að ná þeim markmiðum sem þjónar hagsmunum okkar best. „Því miður bendir ýmislegt til þess að þessi ríkisstjórn hafi ekki lagt sig fram um það heldur noti þetta sem fyrirslátt til að gera pólitískar breytingar á löggjöfinni.“
