Evrópudómstóllinn vegur að launafólki
Í vikunni féll dómur Evrópudómstólsins í Vaxholm-málinu svokallaða en dómurinn kveður á um að heimilt sé að greiða laun samkvæmt kjarasamningum sem gilda í heimalandi verkamanna jafnvel þó verkefnið sé unnið í öðru landi. Forsaga málsins er sú að Lettneskt fyrirtæki tók að sér verkefni í bænum Vaxholm í Svíþjóð og greiddi starfsmönnum sínum samkvæmt lettneskum kjarasamningum. Þessu vildu verkalýðsfélög í Svíþjóð ekki una og börðust af krafti fyrir því að greiða bæri samkvæmt sænskum kjarasamningum. Því miður tók Evrópudómstóllinn ekki undir með Alþýðusambandi Svíþjóðar og vegur þar með að verkalýðshreyfingunni og þeim samningum sem í gildi eru á sænskum vinnumarkaði.
Forsendur Evrópudómstólsins eru þær að vinnuafl skuli vera hreyfanlegt innan EES-svæðisins, það sé ein af grunnstoðum hugmyndafræðinnar um sameiginlegan evrópskan vinnumarkað. Dómurinn telur það sjónarmið vega þyngra en sjálf undirstaða norræns vinnumarkaðar, félagslegir algildir kjarasamningar sem tryggi öllum lágmarkskjör.
Ljóst er að dómurinn vegur gróflega að réttindum launafólks í Evrópu og setur stöðu kjarasamninga á norrænum vinnumarkaði í uppnám. Hér á landi er kveðið á um það í lögum að íslenskir kjarasamningar skuli virtir sem lágmarkskjör. Engu að síður er nauðsynlegt að íslensk stjórnvöld hafi frumkvæði að því að kanna hugsanlegar afleiðingar dómsins og hvetur VG til samráðs við verkalýðshreyfinguna um það efni. VG lýsir samstöðu með verkalýðshreyfingunni hér á landi og í Evrópu í baráttu hennar gegn undirboðum á vinnumarkaði og þeirri atlögu sem nú er gerð að réttarstöðu hennar.
Þá er VG þegar í nánu sambandi við Vinstriflokkinn, systurflokk sinn í Svíþjóð, um málið sem og aðra vinstri sósíalíska og græna flokka á öðrum Norðurlöndunum og mun á þeim vettvangi skoða alla möguleika á samræmdum viðbrögðum við þessum ótíðindum úr ranni hinnar evrópsku samvinnu.
