Hvað þýðir framhald á framkvæmdum?
Iðnaðarráðherra, Finnur Ingólfsson, hefur lagt fram þingsályktunartillögu um að framkvæmdum við Fljótsdals-virkjun verði haldið áfram. Að mati ráðherrans er þetta sáttaleið. En hvað felur hún í sér í raun?
Verði Fljótsdalsvirkjun reist verður byggt 120 þúsund tonna álver á Reyðarfirði. Fimmtán árum síðar verður það orðið of lítið til að borga sig. Áformað er að auka fram-leiðslugetu þess í 480 þúsund tonn. Slíkt álver er þrisvar sinnum stærra en álverið í Straumsvík. Það þarf jafnmikið rafmagn og framleitt er í landinu í dag. Ætlunin er að byggja Kárahnúkavirkjun til að mæta þeirri orkuþörf.
Í dag fara 60% íslenskrar raforku til stóriðju, meirihlutinn af því til álvera. Hugmynd iðnaðarráðherra er að auka þetta hlutfall í um 80%. Og þá vaknar sú spurning hvort það sé einhver skynsemi í því að tekjurnar af yfirgnæfandi meirihluta raforkuframleiðslu í landinu séu háðar heimsmarkaðsverði á áli?
